மழை

நனைந்து விளையாடி
களைத்து நடக்கிறது
குடைகளும்..
கால்களும்
கூடவே
மழைத்துளிகளும்!

நாட்டிய மழை

அபிநயம் பிடிக்கும் மின்னலுடன்
ஜதி சேர்க்கும் இடிக்கு போட்டியாய்
மத்தளம் இசைகிறது
தகர கூரை மீதுவிழும் மழை

அடைமழையாய் ...

நொடிப் பொழுதில் நின்றுவிட்டாலும்
இன்னும் தூரிக்கொண்டே இருக்கிறது
அந்த அழகிய நிமிடங்கள்
நிற்காத அடைமழையென மனமெங்கும் !!

மழையாய் தழுவி....

அவள் மீது
வீழ்வதற்கென்றே
ஆர்ப்பரித்து வருகிறாய்..

அவளின் கூந்தல் நனைத்து
முகம் தழுவி
இடை நழுவி
விழுகிறாய் ...

மழையே
உன்னை போல இன்றேனும்
நானிருக்க வேண்டும்!!

துளித்துளியாய் ஒரு கவிதை

துளித் துளியாய் சொட்டிக் கொண்டிருக்கிறது
முற்றத்தின் கீற்றுகளிலும்
மரங்களின் இலைகளிலும் மழை நீர்

பொழிந்ததின் அடையாளம் சற்று நேரத்தில் மறைந்திடலாம்
நீர் சூழ் மேகங்கள் காற்றின் திசைக்கேற்ப கலைந்து
கதிரவனின் ஒளியால் பெருவெளியெங்கும் தகிக்கலாம்

கூடடைந்த பறவைகளும் , மனிதர்களும்
தங்கள் இயல்புக்கு திரும்பலாம்

குட்டையென தேங்கிய கடைசித் துளியும்
நிலத்தின் உஷ்ணம் விழுங்கியதோடு
பெய்தலின் சுவடற்றுப் போகலாம்

ஆனால் சற்றுமுன் இங்கொரு பலத்த மழை பெய்தது
அதன் சாரல் தொட்டு என் உயிர் நனைத்து
உனக்காய் ஒரு கவிதை செய்துகொண்டிருக்கிறேன் !!

சிறகில் ஒரு பயணம்

பெருமழை நின்ற வானத்தின்
சிறு தூறல் ஒன்றினைக்
கயிறாக பற்றி
பால் வீதியில் உலாவ முயற்சிக்கையில்

எதிர் வந்த தூறலின் நூலிழைநுனி பட்டு
தவறி கீழ் நோக்கி விழ ...

விழுந்த இடம்
பறத்தலுக்கு ஆயத்தமான
பறவையின் சிறகெனபதால்

அச்சிறகையே பற்றி
மீண்டும் ஒரு பயணம் தொடங்குகிறேன்!!

தென்றலென பிறந்தவளே

தென்றலென பிறந்து
முகிலோடு கலந்து
கார்மேகமாய் உருவெடுத்து

பூஞ்சாரலாய்
எம் சுவாசம் வருடி
வானவில்லின் ஜாலத்தோடு

பெருமழையாய்
பூமியை முத்தமிட்டு

மலைகளில் அருவியாய்
ஆர்ப்பரித்து
காடுகளில் நதியாய்
நடனமாடி

கடல் அன்னையில்
சங்கமித்து
சூரியக் காதலனின்
அன்பு தீண்டலில்

மீண்டும் மீண்டும்
குளிர் வாடலாய் பிறக்கிறாய்!!!